گورنر سندھ کا سانحہ گل پلازہ کی جوڈیشل انکوائری کا مطالبہ، سپریم کورٹ کے چیف جسٹس کو خط لکھنےکا اعلان

گورنر سندھ کامران خان ٹیسوری نے سانحہ گل پلازہ پر حکومت کو شدید تنقید کا نشانہ بناتے ہوئے واقعے کی جوڈیشل انکوائری کا مطالبہ کردیا ہے۔

کراچی میں پریس کانفرنس کرتے ہوئے گورنر سندھ نے کہا کہ آگ لگنے کے دو گھنٹے بعد کارروائی شروع ہونا ناقابلِ قبول ہے، ایسے سانحات میں فوری اقدام ہونا چاہیے۔ انہوں نے کہا کہ اگر بروقت ریسکیو کیا جاتا تو قیمتی جانیں بچائی جا سکتی تھیں۔

کامران ٹیسوری نے کہا کہ وہ خود دو گھنٹے بعد گل پلازہ پہنچے، متاثرین کے زخموں پر مرہم رکھا، ریسکیو اداروں کو طلب کیا، پانی منگوایا اور ٹریفک بحال کروائی۔ انہوں نے کہا کہ یہ رویہ قابلِ قبول نہیں کہ گورنر ریسکیو کے لیے جائے تو اسی پر الزام لگا دیا جائے کہ وہ کیوں گیا، جبکہ جن اداروں اور افسران کی ذمہ داری تھی وہ موقع پر موجود ہی نہیں تھے۔ گورنر سندھ نے سوال اٹھایا کہ بتایا جائے اس خون کا ذمہ دار کون ہے اور یہ خون کس کے ہاتھ پر ہے؟

گورنر سندھ نے مخالفین کو مخاطب کرتے ہوئے کہا کہ سیاست کرنے والوں کو سمجھنا چاہیے کہ کراچی کے عوام کے دلوں میں نفرت بھر چکی ہے۔ انہوں نے کہا کہ بے حسی انتہا کو پہنچ چکی ہے لیکن کسی کے کان پر جوں تک نہیں رینگ رہی۔ انہوں نے مطالبہ کیا کہ ذمہ داروں کا تعین کرکے انہیں فوری اور عبرتناک سزا دی جائے۔

کامران ٹیسوری نے سانحہ گل پلازہ کی جوڈیشل انکوائری کا مطالبہ دہراتے ہوئے اعلان کیا کہ وہ اس حوالے سے سندھ ہائیکورٹ اور سپریم کورٹ کے چیف جسٹس کو خط لکھیں گے اور خود کو بھی جوڈیشل کمیشن کے سامنے پیش کریں گے تاکہ حقائق سب کے سامنے آسکیں۔

گورنر سندھ نے وزیراعلیٰ سندھ کو مخاطب کرتے ہوئے کہا کہ شاید آپ کو درست معلومات فراہم نہیں کی جا رہیں۔ انہوں نے سوال کیا کہ مشینری صحیح طریقے سے کام کیوں نہیں کر رہی اور یہ کیسا نظام ہے کہ جس شخص کا باپ جاں بحق ہوا، اسی کے بیٹے پر لاٹھی چارج کیا جا رہا ہے؟

انہوں نے واضح کیا کہ وہ اس معاملے پر سیاسی الزام تراشی کی اجازت نہیں دیں گے۔ ان کا کہنا تھا کہ یہ فائل بند نہیں ہوگی، اگر کسی نے سیاست کرنے کی کوشش کی تو وہ سب کا کچا چٹھا کھول دیں گے۔ گورنر سندھ نے کہا کہ اگلی پریس کانفرنس میں وہ بہت کچھ بتائیں گے اور جو غم و غصہ دل میں ہے وہ صبر کے دائرے میں رہتے ہوئے قوم کے سامنے رکھیں گے۔

کامران ٹیسوری نے کہا کہ وہ انتظامیہ کی مجرمانہ غفلت پر پردہ ڈالنے نہیں دیں گے۔ انہوں نے کہا کہ وہ فیلڈ مارشل سے کہیں گے کہ کراچی آپ کا منتظر ہے، آکر دیکھیں یہاں کس نے زیادتی کی ہے۔ ان کا کہنا تھا کہ صدر آصف علی زرداری، چیئرمین پیپلزپارٹی بلاول بھٹو زرداری اور آصفہ بھٹو زرداری لواحقین کو انصاف دلا سکتے ہیں۔

پریس کانفرنس کے دوران گورنر سندھ کامران ٹیسوری نے سانحہ گل پلازہ میں جاں بحق افراد کے لواحقین کے لیے ایک ایک پلاٹ دینے کا اعلان بھی کیا۔