کراچی کے علاقے کورنگی ساڑھے 5 جی ایریا میں گھر میں ڈکیتی کی سنگین واردات پیش آئی، جہاں ڈاکوؤں نے خاتون کو بے ہوشی کا انجیکشن لگا کر گھر کا صفایا کر دیا۔
پولیس کے مطابق واردات میں دو خواتین اور ایک مرد ڈاکو شامل تھے۔ واقعے کا مقدمہ زمان ٹاؤن تھانے میں متاثرہ خاتون کی مدعیت میں درج کر لیا گیا ہے، جبکہ پولیس نے تفتیش کا آغاز کر دیا ہے۔
مدعیہ خاتون نے بیان دیا کہ اس نے دروازہ کھولا تو ایک خاتون سامان فروخت کرنے کے بہانے آئی تھی۔ خاتون کو اندر بلانے پر اس نے اپنی بیٹی کو فون کر کے مزید سامان لانے کا کہا۔ کچھ ہی دیر بعد اس خاتون کی بیٹی کے ساتھ ایک نوجوان لڑکا بھی زبردستی گھر میں داخل ہو گیا۔
متاثرہ خاتون کے مطابق نوجوان نے اسلحہ دکھا کر اسے بے ہوشی کا انجیکشن لگا دیا۔ جب اس نے مزاحمت کی تو ملزم نے اس کا سر دیوار سے دے مارا جس کے باعث وہ بے ہوش ہو گئی۔
خاتون نے بتایا کہ ملزمان نے تجوری کھول کر 7 لاکھ روپے نقدی نکال لی۔ اس کے علاوہ 15 گرام وزن کے دو سونے کے سیٹ، چار انگوٹھیاں، ایک بریسلٹ اور موبائل فون بھی ساتھ لے گئے۔ واردات کے بعد ملزمان موقع سے فرار ہو گئے۔
پولیس کا کہنا ہے کہ واقعے کی مزید تفتیش جاری ہے اور ملزمان کی شناخت کے لیے مختلف پہلوؤں سے تحقیقات کی جا رہی ہیں۔
