قونصل جنرل جمہوریہ چین یانگ یونڈونگ نے نئے چینی سال 2026 کا استقبال کرتے ہوئے کہا کہ چینی قمری کیلنڈر میں سال 2026 گھوڑوں کا سال ہے۔
چینی روایتی ثقافت میں گھوڑا آزادی، جذبہ اور لامحدود جدوجہد کی علامت ہے۔ یہ سال پھلتی پھولتی توانائی، ناقابل تسخیر جذبہ، بلند حوصلہ اور شاندار کامیابی کی نمائندگی کرتا ہے۔
قونصل جنرل نے یہ موقع کراچی کے صحافیوں اور میڈیا نمائندوں کے ساتھ کراچی قونصلیٹ میں منعقدہ پروقار تقریب میں استعمال کیا۔ انہوں نے کہا کہ نئے سال کے جشن کا مقصد دوستانہ تعلقات کی تجدید اور پاکستان کے ساتھ دوستی کو مضبوط کرنا ہے۔
یانگ یونڈونگ نے کہا کہ گزشتہ ایک سال کے دوران چین اور پاکستان کے درمیان تعلقات مزید بہتر ہوئے ہیں۔ سندھ اور بلوچستان میں عملی تعاون نے مسلسل ترقی اور نئے سنگ میل حاصل کیے ہیں۔ ان کامیابیوں کو دونوں ممالک کے رہنماؤں کی حکمت عملی اور مشترکہ کوششوں کا ثبوت قرار دیا۔
چین اور پاکستان کی دوستی نے باہمی افہام و تفہیم اور تعلقات کے پل قائم کیے ہیں۔ قونصل جنرل کے مطابق پاکستانی میڈیا اس تعلق کی مضبوط ترقی کی عکاسی کرتا ہے اور اسے "آئینے” کے طور پر دیکھنا چاہیے۔
انہوں نے مزید کہا کہ سال 2025 چین کے 14 ویں پنج سالہ منصوبے کا اختتامی سال تھا، اور اس دوران عالمی اقتصادی سست روی، یکطرفہ پسندی اور بین الاقوامی اقتصادی و تجارتی چیلنجز کے باوجود چین کی معیشت نے مضبوط ترقی حاصل کی۔
یانگ یونڈونگ نے کہا کہ اصلاحات اور کھلے پن کو فروغ دیا گیا، صارفین کی منڈی پھیل رہی ہے، نئی معیاری پیداواری قوتیں مسلسل ترقی کر رہی ہیں، اور سبز و کم کاربن کی منتقلی کی رفتار تیز ہو گئی ہے۔ سال 2026 چین کے 15 ویں پنج سالہ منصوبے کا افتتاحی سال ہے، جو سوشلسٹ جدیدیت کی جانب ایک نئے سفر کا آغاز ہے۔ چین معاشی معیار کی بہتری اور معقول نمو کو فروغ دینے کے لیے فعال مالیاتی اور معتدل آسان مانیٹری پالیسی جاری رکھے گا۔
