بی پی ایل: کھلاڑیوں کے چیک باؤنس، لیگ میں پھر واجبات کی عدم ادائیگی کا مسئلہ اٹھ گیا

بنگلا دیش پریمیئر لیگ میں واجبات کی عدم ادائیگی کا مسئلہ دوبارہ سر اٹھانے لگا

بنگلا دیش پریمیئر لیگ (BPL) میں ایک بار پھر واجبات کی عدم ادائیگی کا مسئلہ سامنے آیا ہے۔ بنگلادیشی میڈیا کے مطابق 12 ویں ایڈیشن کے اختتام پر یہ مسئلہ ابھر کر سامنے آیا، اور بی پی ایل کی گورننگ کونسل نے تمام فرنچائزز کو بقایا جات کلیئر کرنے کے لیے خط لکھا ہے۔

میڈیا کے مطابق 27 جنوری کو لکھے گئے خط میں فرنچائزز کو 15 روز کے اندر بقایا جات ادا کرنے کی ہدایت دی گئی۔ 12 ویں ایڈیشن کے دوران گزشتہ سال کی طرح فوری عدم ادائیگی کا معاملہ سامنے نہیں آیا، تاہم ٹی ٹوئنٹی ورلڈ کپ اور کھلاڑیوں کے بائیکاٹ کی وجہ سے یہ معاملہ تاخیر سے ظاہر ہوا۔

ایک کھلاڑی نے کہا کہ فرنچائزز نے اب تک صرف 25 فیصد ادائیگی کی ہے، اور 20 جنوری کو کھلاڑیوں کے چیک باؤنس ہوئے، جس کی تصدیق کسی سے بھی کی جا سکتی ہے۔ چیمپئن فرنچائز راجشاہی وارئیرز نے تمام واجبات کلیئر کرنے کا دعویٰ کیا ہے۔

بی پی ایل ممبر سیکرٹری افتخار رحمان نے کہا کہ بعض فرنچائزز نے معاہدوں کے مطابق واجبات کلیئر کرنے ہیں۔ فرنچائزز کو سب فہرستیں مہیا کر دی گئی ہیں اور ادائیگی کے لیے 15 روز کی مہلت دی گئی ہے۔