وسطی افریقی ملک کانگو کے مشرقی علاقے ربایا میں کالٹن کی ایک کان بیٹھ گئی ہے، جس کے نتیجے میں 200 سے زائد افراد ہلاک ہونے کی اطلاعات ہیں۔ غیر ملکی میڈیا کے مطابق یہ واقعہ بدھ کے روز پیش آیا اور کان میں موجود افراد میں بچے اور خواتین بھی شامل تھے۔ تاہم جمعے تک ہلاک شدگان کی صحیح تعداد کا تعین نہیں ہو سکا۔
رپورٹس کے مطابق لینڈ سلائیڈنگ اور بارشوں کے سیزن کے باعث زمین نرم ہونے کی وجہ سے کان بیٹھ گئی، جس کے نتیجے میں کان میں موجود مزدور دب گئے۔ حادثے میں تقریباً 20 افراد شدید زخمی بھی ہوئے جنہیں فوری طور پر طبی مراکز میں منتقل کر کے امداد فراہم کی جا رہی ہے۔
ربایا صوبے کے حکام نے بتایا کہ کان بیٹھنے کے بعد امدادی کارروائیاں شروع کر دی گئی ہیں اور متاثرہ افراد کو بچانے کی کوششیں جاری ہیں۔ یہ صوبہ دنیا کے کالٹن کی پیداوار کا تقریباً 15 فیصد فراہم کرتا ہے، جو موبائل فونز، کمپیوٹرز، ایروسپیس اور ٹربائنز میں استعمال ہونے والی اہم دھات ٹینٹالم تیار کرنے کے لیے استعمال ہوتی ہے۔
ماہرین کے مطابق کانگو میں ایسے حادثات کی بنیادی وجوہات میں غیر محفوظ مائننگ کے طریقے اور موسمی حالات شامل ہیں، جس کے باعث کان کی حفاظت میں مسلسل چیلنجز پیش آتے ہیں۔
