امریکی صدر ڈونلڈ ٹرمپ اور چینی صدر شی جن پنگ کے درمیان ٹیلیفونک رابطہ ہوا ہے۔
امریکی صدر ڈونلڈ ٹرمپ نے چینی ہم منصب کے ساتھ ہونے والی بات چیت کو شاندار قرار دیا ہے۔ ملاقات کے بعد جاری کیے گئے بیان میں انہوں نے کہا کہ صدر شی جن پنگ سے تجارت، فوجی امور، تائیوان کی صورتحال، روس یوکرین تنازع اور ایران کی موجودہ صورتحال سمیت متعدد اہم عالمی معاملات پر تفصیلی گفتگو ہوئی۔
صدر ٹرمپ کے مطابق چین کی جانب سے امریکا سے تیل اور گیس کی خریداری، اضافی زرعی مصنوعات کی درآمد اور طیاروں کے انجنوں کی ترسیل جیسے اقتصادی معاملات بھی زیر بحث آئے۔ انہوں نے اس رابطے کو دونوں ممالک کے تعلقات کے لیے مثبت پیش رفت قرار دیا۔
دوسری جانب چینی میڈیا کے مطابق صدر شی جن پنگ نے امریکی صدر سے گفتگو کے دوران امریکا چین تعلقات میں تائیوان کے مسئلے کو نہایت اہم قرار دیا۔ چینی صدر نے امریکا کو تائیوان کے ساتھ اسلحہ معاہدوں کے معاملے میں انتہائی احتیاط برتنے کا مشورہ دیا اور خطے کے امن و استحکام پر زور دیا۔
اسی دوران چین اور روس کے صدور کے درمیان بھی ٹیلیفونک گفتگو ہوئی۔ کریملن کے مطابق چینی صدر شی جن پنگ اور روسی صدر ولادیمیر پیوٹن نے ایران، یوکرین سمیت دیگر اہم عالمی امور پر تبادلہ خیال کیا۔ روسی صدر پیوٹن نے صدر شی جن پنگ کی جانب سے دورہ چین کی دعوت بھی قبول کر لی ہے، جسے دونوں ممالک کے تعلقات میں مزید بہتری کی جانب ایک اہم قدم قرار دیا جا رہا ہے۔
